التعلـــــــــــــــــــــــــــــــــــــــــــــــــــــــيم في المغرب

  منظومة التعليم

منظومة التعليم مبنية على خمسة أركان، التلميذ، الاستاذ، البرنامج التعليمي، المؤسسة التعليمية و أولياء الأمور. إلى ركن واحد من هاد الأركان كان فيه الخلل، فهو كا يأثر على المنظومة كاملة.

مما لا يختلف فيه شخصان، و لا يتناطح فيه كبشان، هو منظومة التعليم هي الأساس ديال كل دولة. هي البذرة لي غادي تعطينا شجرة، و ديك الشجرة فيها فروع. الفروع هي مختلف مجالات الحياة. أنعطيك بعض الأمثلة:

- بغيني قطاع صحة متطور و فيه باحثين و أطباء و ممرضين ممتازين و متخلقين بأخلاق المهنة، رآه خاصك تعطيهم تعليم جيد.

- بغيتي قضاء نزيه و محترف و قوانين مدروسة، راه خاصك تعليم جيد لي غادي يعطيك قضاة و محامين و وكلاء نيابة متعلمين على أعلى مستوى.

- بغيني نهضة فالعمران، راه خاصك تعليم جيد لي غادي يعطيك مهندسين و تقنيين مبدعين.

- بغيتي قوة عسكرية لحماية البلاد، راه خاصك تعليم جيد لي غادي يعطيك مهندسين عسكريين، و مخترعين مبتكرين باش ما تعتامدش على شراء الأسلحة الأجنبية.

- بغيتي إقتصاد قوي، راه خاصك تعليم جيد لي يعطيك مقاولين و عصاميين و كفاءات وطنية فمجال الإقتصاد و إدارة الأعمال. ماشي شركة وطنية و المدير العام أجنبي.

- بغيتي صناعة قوية و زراعة قوية، باش يكون عندك أمن غذائي و إقتصاد إنتاجي، راه خاصك تعليم جيد لي يعطيك مهندسين و تقنيين فلاحيين

الخلاصة التعليم هو النواة ديال أي دولة فالعالم، إذا صلح صلح كل شيء، و إذا فسد فسد كل شيء.

نمشيو دابا دقة دقة و نشوفو كل ركن من الأركان الخمسة لي ذكرنا فالمقدمة مشينا ؟ مشينا

- الأساتذة و الأطر التعليمية بصفة عامة:

تخيل معايا أنك داخل لشي حرب، و عندك جيش خاصو تكوين و قيادة. واش غادي تعطي هاد الجيش لي هو الأمل الوحيد ديالك، لاي شخص غادي تصادفو فالشارع و تقولو آجي تكون قائد ديال الجيش ؟ او غادي تختار بعناية أفضل الكفاءات و تدوزهم من إختبارات عديدة باش تختار الأفضل لقيادة الجيش ؟

أكيد أنك غادي تختار بعناية القائد ديال الجيش، لأن الكفاءة ديالو غادي تنعاكس على الجيش، لي هو الأمل ديالك فالحياة.

نعطيك مثال آخر، كلية الطب لي غادي يتخرجو منها أطباء، كا يدخلو ليها غير المتفوقين، و فيها سنوات طويلة ديال التكوين. علاش ؟ لأن هاد الناس غادي يكونو مسؤولين على الأرواح البشرية، و خاص نكونوا متأكدين أنهم فالمستوى و عندهم الكفاءات الضرورية للحفاظ على الأرواح البشرية.

حتال هنا مفاهمين؟

إلى كان الطبيب حيت مسؤول على الأرواح البشرية كا يتم الإختيار ديالو بعناية و مدة التكوين طويلة. و قائد الجيش لي مسؤول على قيادة الجيش و حماية الوطن كا يتم الإختيار ديالو بعناية. فما بالك بالمسؤول على العقول البشرية، لي هو لي غادي يعطينا الطبيب و قائد الجيش و المهندس، و رئيس الدولة.... كيفاش خاص يتم الإختيار و التكوين ديال هاد الشخص ؟

راه ما كايناش لوجيك، فاش كا تلقى دولة كا تشدد الإجراءات ديال الولوج لكلية الطب لإنقاذ الارواح، و كا ترخفها لمراكز تكوين الأساتذة و الأطر التعليمية، لي مسؤولة على إنقاذ العقول لي هي أهم من الأرواح

فين هي اللوجيك فاش يتم إهمال النواة و الاهتمام بالفروع؟ و هنا ماشي كا نقلل من قيمة الطبيب او قائد الجيش، بالعكس هوما عندهم أهمية كبيرة، و من المصلحة ديال هاد القطاعات، يكون قطاع التعليم متفوق.

رآه مشروع تكوين طبيب و مهندس و عالم كا يبدا من الأقسام الابتدائية، ماشي حتال من بعد البكالوريا رآه الحالة ديال الفروع ديال الشجرة متعلقة أساسا بالحالة ديال جذع و جدور الشجرة.

الاساتذة و الأطر التعليمية خاص إجراءات الإختيار ديالهم تكون صارمة، و مدة التكوين تكون كافية. خاص ولوج مدارس تكوين الأساتذة و الأطر التعليمية يكون للطبقة المتفوقة و المبدعة من مكونات الدولة. راه طبيب الى تخرج و هو جاهل، فنسبيا غادي يتسبب فوفاة المئات و هذا أمر خطير. لكن ما بالك إلى تخرج أستاذ و هو جاهل؟ راه غادي يتسبب فنشر الجهل و تدمير مستقبل الآلاف طيلة المشوار ديالو. سواء بتلقين معلومات خاطئة، او نشر الإحباط و قتل الإبداع فنفوس التلاميذ....

الأستاذ هو الركن الأهم من أركان المنظومة، و خاص يتم تشديد إجراءات الولوج و التكوين و التخرج. خاص النخبة هي لي يتخرج منها الأساتذة. لكن فالمقابل و بما أنها غادي تكون النخبة، إذن خاص محفزات، لي تخلي النخبة تتاجه للتعليم. و لذلك خاص ما يلي :

- إقرار قانون لحماية المدرسين و الأطر التعليمية شبيه بالقانون لي كا يحمي رجل الشرطة او الجندي، لي لابس البذلة. راه كما تعلمون الاعتداء على شرطي العقوبة ديالو أشد من الإعتداء على مواطن مدني. و خاص نفس الحماية للأساتذة. من أجل إرجاع الهيبة للمدرس و فرض الإحترام ديالو. دولة لي فيها الأستاذ كا يتضرب من طرف التلاميذ هي دولة فاشلة فمنظومة التعليم و التربية.

- خاص تخصيص رواتب مهمة للأساتذة، و خاصها تكون رواتب من أعلى الرواتب فالدولة. و هذا ماشي تبذير المال العام كيف كا يروج ليه "صندوق النقد" و "البنك الدولي"، لأن هذا إستثمار و إستثمار مربح. و أهم إستثمار فالدولة كامل.

- خاص تقديم إمتيازات من قبيل الإعفاء الضريبي، القروض المجانية من أجل إستقطاب الكفاءات المتفوقة فالدولة لمجال التعليم.

- خاص إدراج التوفر على حس عالي من الوطنية و الغيرة على الوطن و التربية و الأخلاق، فشروط الولوج لمدارس تكوين الأساتذة. باش يكون المدرس بالإضافة لنشر المعرفة ينشر الوطنية و التربية الحسنة.

- خاص وضع قوانين أيضا صارمة للأساتذة المتهاونين او المقصرين. و إرسالهم لإعادة التكوين و التأهيل عند الحاجة. و الطرد في حالة الضرورة القصوى كما فالجيش.

- خاص ضمان التكوين المستمر للاساتذة. يعني خاص ميزانية لانجاز دورات تكوينية للاساتذة، و إرسالهم ف بعثات للدول الأخرى من أجل تطوير المعارف، و مواكبة العصر. باش ما تلقاش أستاذ، فسنة 2020 مازال كا يقري بنفس المنهجية و المعلومات لي كان كا يدرس بهم سنة 2000.

- خاص ضمان تغطية صحية للأساتذة و الأطر التعليمية.

- خلق تنافسية بإقامة مسابقات من نوعية "أستاذ السنة" على الصعيد المحلي و الوطني.

- المكون الثاني "التلميذ او الطالب" :

التلميذ هو ثاني أهم شخص فالمنظومة، و هو الأمل و نتيجة الإستثمار. هادشي علاش خاصو عناية خاصة.

- خاص إعطاء قيمة للتلميذ، خاص التعامل معاه بعناية خاصة. الإهتمام بالميولات ديالو، التشجيع المتواصل ماشي القمع و التحقير.

- مصطلحات من قبيل "كاسول" و "مكلخ" و "سطل" خاص يتعاقب على الاستعمال ديالها داخل المؤسسات التعليمية. حيت ما كاينش شي واحد "كاسول" او "مكلخ" لأن كل إنسان بارع فشي تخصص و عندو ميولات لبعض المجالات و عندو نفور من مجالات أخرى. يعني طيبيعي يتكاسل فمجال عندو منو نفور، و طبيعي يكون مجتهد و متحمس فمجال قريب للميولات ديالو.

- خاص جس النبض و الإطلاع على ميولات التلميذ منذ السنوات الأولى ماشي حتى يوصل لمرحلة دراسية متقدمة و عاد نقولو ليه واش باغي تكون مهندس فلاحي او طبيب او جندي او فنان تشكيلي الاهتمام بهاد الميولات منذ الصغر، بحالو بحال التشخيص المبكر للمرض. حيت كا يعطي وقت بإختيار المسلك المناسب للتلميذ، و التركيز على المواد لي غادي يحتاجها فالمجال لي كا يميل ليه. بطبيعة الحال دون إغفال المواد الأخرى.

- خاص تشجيع التلاميذ على البحث و التعلم الذاتي، و تجاوز نظام الحفظ و تقيئ المعلومات على ورقة الإمتحان.

- خاص منح الفرصة للتلميذ باش يعبر على الافكار ديالو و يعطي الأجوبة لي هو مقتانع بها بلا ما يتعرض للقمع، أو السخرية.

- خاص محاربة التعليم الانتقائي لي كا يعطي الأفضلية لتلاميذ على حساب الآخرين. و تكون فرص التعليم الجيد متاحة لجميع شرائح الشعب بدون تفضيل او عراقيل.

- ضمان حق العودة لمقاعد الدراسة في أي سن، و محاربة الهدر المدرسي. و خاص بعض أنواع الجامعات و مراكز التكوين يكونو مفتوحين فوجه الجميع بدون الحاجة لشهادة البكالوريا. مثلا التخصصات لي فيها اللغات او التكنلوجيا التطبيقية، الفنون... رآه تقدر تلقى شخص عندو ميول لتعلم اللغات و الترجمة، لكن ما قدرش يحصل على الباكلوريا حيت ما عندوش ميول للمواد الأخرى.

- خاص إعتماد البكالوريا المتخصصة. يعني مثلا أنا باغي ندير تخصص اللغات و الترجمة، و ما يعنديش مع الفيزياء و الكيمياء و حل المعادلات الرياضية.

- مجانية التعليم.

الركن الثالث: البرنامج التعليمي ( المقررات )

المحتوى المدرس هو ثالث أهم ركن فالمنظومة التعليمية. المحتوى ديال المقررات خاصو يكون من إنتاج وطني %100 و غير مستورد لعدة إعتبارات :

المقرر بحالو بحال الدواء، و ما كاينش شي دواء كا يوالم جميع المرضى بدون إستثناء، لأن كل جسم و عندو الخصوصيات ديالو. و نفس الأمر بالنسبة للمقررات. راه كل دولة و عندها الثقافة ديالها، و التكوين الاجتماعي ديالها، و الإمكانيات ديالها. و خاصها مقرر كا ياخذ بعين الإعتبار هاد الامور، بدون المساس بالمادة العلمية.

و من الأخطاء لي كا ترتاكبها بعض الدول السائرة فطريق النمو، هي التقليد الاعمى. كا يمشيو لشي دولة فيها مؤشر التعليم ممتاز، كا ياخذو المقرر ديالها، كا يترجموه و يجيبوه الدولة ديالهم. و المشكل هو أن نجاح داك المقرر فديك الدولة المتقدمة راه بسبب عوامل أخرى من غير المحتوى، و ديك العوامل ما متوفراش فديك الدولة المستوردة للمقرر

مثلا كا تجيب مقرر مادة الفيزياء ديال السويد، و كا تبغي تقريه للتلاميذ ديال دولة ما عندهاش تجهيزات لإنجاز التجارب لي فداك المقرر، و الأساتذة ديالها ما عندهومش تكوين فدوك التجارب. و كا ترمي ليهم المسؤولية و هوما كا قضيو باش ما جاب الله، و التلميذ كا يقرا الفيزياء و الكيمياء لي هي علوم تجريبية بدون إنجاز التجارب الضرورية واش الفيزياء و الكيمياء كا يتقراو بالنظري آعباد الله

او كا تلقى دولة جايبة مقرر التاريخ من إنجلترا لي كا يتكلم على الحرب العالمية الثانية. و إنجازات الحلفاء و البطولة ديالهم، و ما كا يذكرش أن معظم ديك الدول لي كانت كا تدافع على الأراضي ديالها ضد الإحتلال الألماني. هي بنفسها و فنفس الفترة كانت مستعمرة ديك الدولة المستوردة لداك لكتاب، و رتاكبات فيها مجازر وحشية. كيفاش غادي تقري شعب ديال شي دولة التاريخ ديالو، بكتب مستوردة مكتوبة من طرف المنتصر فالحرب و لي هو براسو كان مستعمر همجي

فاش كا نتكلمو على المقررات التعليمية، ضروري نتكلمو على تحديث المقررات. راه لا يعقل سنة 2020 مازال دول كا تقري دروس لي قراوها الناس سنة 2000. راه كاين أساتذة لي كا يستعمل دروس كتبها قبل ثلاث سنوات، بدون ما يحاول يطورها. راه شخصيا مقال إلى رجعت قريت المقالات لي كتبت غير فشهر رمضان الماضي، ما نلقى فيها بزاف ديال النقاط لي يمكن نطورها او نحسن الصياغة ديالها، و نعدل بعض المعلومات فيها. حيت وقعو أحداث من بعد. فما بالك بمقرر دراسي او درس كاتبو أستاذ قبل ثلاث سنوات، و عمرو فكر يرجع يعاود الاعداد ديالو.

ما كاين حتى مقرر فالدول العربية كا يتكلم على الربيع العربي بالايجابيات ديالو و السلبيات ديالو. مع العلم أنه أثر فجميع الدول العربية بدون إستثناء. و مازال بعض الدول كا تقري الثورة الفرنسية و البلشفية .

خاص الهيئة المسؤولة على إعداد المقررات يتختارو الناس ديالها بعناية، و يكونوا مستقلين و وطنيين، و ما عندهم حتى إنتماء سياسي او حزبي، و ما كا يخدموا حتى جهة سواء داخلية او خارجية. راه إعداد المقرر الدراسي خاصو يكون بنفس الأهمية لي كا تعطى لاعداد مشروع سري متعلق بالأمن القومي. راه المقرر أهم من الصاروخ و القمر الصناعي، و الطائرة المسيرة و التخطيط العسكري، راه هو ركن مؤثر فمستقبل الدولة. و خاص الاعداد ديالو تعطاه ميزانية كبيرة و يتعطى لاحسن الكفاءات الوطنية الوطنية الوطنية الوطنية فالبلاد. راه هو لي غادي يعطينا صانع الصاروخ و القمر الصناعي و الطائرة المسيرة ماشي العكس

فالتدريس خاص إعتماد اللغة الوطنية ( كيفما كانت ) و إعتماد اللغة الإنجليزية أيضا بإعتارها اللغة العالمية للمعرفة حاليا، راه من أهم عناصر نجاح شي مقرر هو اللغة ديالو. و الناس لي كا يقولو التعليم بالانجليزية صعب. غادي نقول لكم، كون تم إعتماد اللغة الإنجليزية سنة 2000 فأي دولة غير متحدثة بالإنجليزية، و بداو من الابتدائي ( باش ما نخلقوش مشكل لدوك لي قراو النص بلغة أخرى )، فداك الجيل ديال سنة 2000 غادي يكون اليوم حاصل على شهادة البكالوريا بالإنجليزية بدون مشاكل، لأنه من الصغر و هو ما يقرا بها، و هاد الجيل غادي يعطي المشعل لأجيال أخرى، و من بعد فقط أربعين سنة غادي يكون عندنا زوج ديال الأجيال متقنين للغة العربية و الانجليزية و تبقى اللغات الأخرى إختيارية لأنها أقل أهمية.

لكن حيت الدول ما داروش هاد الخطوة سنة 2000 هاهوما ضيعو 20 سنة. و إلى ما داروش هاد الخطوة سنة 2020,ف غادي ندمو سنة 2040. رآه السنوات كا تطير، و الأجيال كا نضيع، بسبب التردد و التراخي. و القطار السريع غادي و بعض الدول مازالة متمسكة بالقطار البخاري ( بعض اللغات لي أكل عليها الدهر و شرب ) و مازال كا يتفاخرو على بعضهم بإتقان لغة شبه ميتة و نساو ان اللغة هي وسيلة للتواصل ماشي للتفاضل، كما قال أحد المفكرين.

يجب إنشاء منصة تعليمية رقمية تعمل إما عن طريق الإتصال بالانترنت، او التثبيت فالهواتف او الحواسيب دون الحاجة للإنترنت ( جيل الثمانينات و التسعينات غادي تكونو عاقلين على الموسوعة العلمية "أنكارطا" ).

هاد المنصة او الموسوعة التعليمية خاص إختيار أستاذ من كل مادة من كل مدينة يتكلف بشرح درس واحد عن طريق الفيديو و تقنية الابعاد الثلاثية فمختبرات تصوير تابعة لوزارة التعليم، و هاد الدروس يتوضعو فالمنصة. و بهاد الطريقة إلى فترضنا الدولة فيها فقط 10 مدن، ف كل تلميذ فالدولة غادي يكون عندو درس فمادة معينة مشروح من طرف عشرة أساتذة. إلى ما فهمش من عند واحد يفهم من عند الآخر

الركن الرابع: المؤسسة التعليمية :

المؤسسة التعليمية الأهمية ديالها لا تقل عن بقية الأركان لي شفنا من قبل. لأنها هي المكان لي كا يجمع الأستاذ، التلميذ و المقرر الدراسي. خاص هاد الؤسسات تكون مجانية. و تكون مجهزة بكل الوسائل الضرورية. و تكون العدالة بين مختلف المؤسسات على مستوى الدولة، ماشي تلميذ كا يدرس العلوم الطبيعية فمؤسسة مجهزة بمختر و كل الوسائل الضرورية للقيام بالتجارب، في حين مؤسسة أخرى غير مجهزة و التلاميذ كا يقراو غير بالنظري. و فالنهاية يدوزو بزوج نفس الإمتحان

المؤسسة التعليمية هي ماشي فقط مكان للدراسة، لكن أيضا مكان للتربية، و هادشي علاش فالبداية قلت خاص من شروط الولوج لمراكز تكوين الأساتذة التحلي بالاخلاق و التربية. و أي أستاذ او إطار تعليمي يثبت عليه الإخلال بهاد المبادئ، خاص إعادة التأهيل ديالو او الطرد النهائي فبعض الحالات.

راه حشومة يكون أستاذ كا يجي سكران للمؤسسة التعليمية، او أستاذ كا يتحرش بالتلاميذ، أو أستاذ كا يستعمل مصطلحات خادشة بالحياء.

ايضا من أهم مقومات المؤسسة التعليمية هي "الأمن"، المؤسسة التعليمية خاصها تعتابر مؤسسة حساسة و من الأمن القومي. و خاص وضع أمن خاص او شرطة بالقرب من المؤسسات التعليمية، من أجل توفير الحماية للأساتذة و أيضا التلاميذ. راه من العار يتم توزيع الأقراص المهلوسة و المخدرات أمام المؤسسات التعليمية، او التحرش بالتلميذات أمام المؤسسة التعليمية

خاص أيضا وضع مكتب إجتماعي لتلقي الشكايات و حل المشاكل بين التلاميذ و الأساتذة بطريقة ودية. و أيضا لحماية الأساتذة من بعض التدخلات العنيفة من طرف بعض أولياء الأمور مكانة الأستاذ يجب أن تحترم و تقدس ما دام يقوم بواجبه و يتحلى بالاخلاق. و أولياء الأمور ما خاصش تكون عندهم سلطة او تأثير على قرارات الأساتذة.

الركن الأخير، أولياء الأمور:

المؤسسة التعليمية و الأستاذ ماشي بوحدهم لي مسؤولين على التربية و التعليم ديال التلاميذ. رآه أولياء الأمور عندهم دور مهم. خاصهم يتابعوا النتائج ديال ولادهم، و يشوفو المستوى ديالهم، و يسمعو للمشاكل ديالهم، و للرغبات و الميولات ديالهم. راه عيب و عار تلقى أب متبع أخبار أمريكا، و روسيا، و الصين و سوريا و العراق و ليبيا، و ما متبعش الحياة الدراسية ديال ولادو، ما عارفش المشاكل ديالهم، المخاوف ديالهم، الاختيارات ديالهم....

و الشيء بالشيء يذكر، بما أننا جبدنا الاختيارات، فأولياء الأمور ما خاصهومش يفرضو على ولادهم نوعية التخصص لي يتبعون. نعم النصيحة و التوجيه مزيان، لكن بدون الإكراه. خاصك ديري الميدسين حيت بنت خالتك دايراها ، واش هي أحسن منك ؟

خاصك تدير الهندسة الفضائية حيت ولد عمك دارها، واش هو احسن منك؟

هاد الأسلوب مقرف بكل معنى الكلمة، لأن بكل بساطة بنتك ماشي بالضرورة عندها نفس الميولات و الرغبات و المؤهلات لي عند بنت خالتها. و ولدك ما عندوش بالضرورة نفس الأحلام لي عند ولد عمو

شجعو ولادكم يختارو بعض المجالات الحيوية و لي فيها مستقبل، لكن بالعقل ماشي بالمقارنات و الإكراه. و حتى الجانب المادي ماشي مبرر، راه شحال من فنان تشكيلي عايش أحسن من طبيب او مهندس. و شحال من عازف على شي آلة موسيقية عايش أحسن من ربان طائرة

ماشي عيب تبغي ولدك يخرج طبيب او مهندس، و إلى بغيتيه يتبع هاد شي مجال، ف خاصك من الولادة ديالو تحبب ليه داك المجال، باش من بعد يختارو راسو و تهناو بزوج

نداء لبعض أولياء الامور، جمعية آباء و أولياء التلاميذ، ماشي جمعية لتحقيق رفاهية أبناء أعضاء الجمعية راها للجميع و خاص تخدم مصلحة جميع التلاميذ بدون إستثناء. و نتمنى أن هاد الجمعيات يقومو بحملات تبرع خارج المؤسسة، و يشوفو المحسنين و يجمعو التبرعات( فإطار قانوني ) و يستثمروها لشراء معدات للمؤسسة ( شاشات تلفاز لعرض محتوى رقمي، سيارة لنقل التلاميذ القاطنين في أماكن بعيدة، ....)

كا نتمى أيضا من المحسنين لي مركزين على بناء المساجد، يديرو إلتفاتة للمدارس، راه فيها أجر، لأن فيها نشر العلم. بلاصت ما تزلجو مسجد بالزليج البلدي و الرخام، زلجوه بزليج عادي ( راه الله ينظر لعمل العبد و العبادة ماشي للزليج ) و ثمن الزليج ( لي هو بالملايين ) شريو بيه معدات للمدارس، راه كاين مدارس ما فيهم حتى " داتا شو Data show - vidéo projecteur "

الخلاصة :

هادشي لي قلت كامل لفوق، التطبيق ديالو ماشي مستحيل، لأنه مطبق فأكبر الدول الناجحة فالتعليم، لكن باش ما نحلموش، هادشي خاصو ميزانية ضخمة. و خاص أي دولة بغات تصلح منظومة التعليم، خاصها تعطيها دم جوفها. خاصها فالبداية تخصص أكبر جزء من الميزانية السنوية للتعليم، و ماشي مشكل مرحليا تخفض ميزانية قطاعات أخرى، لأن التعليم إلى نجح غادي ينجحو جميع القطاعات، و إلى فشل غادي يفشلو كاملين.

خاص الابتعاد على أي برنامج لتقديم القروض( البنك الدولي، صندوق النقد ) لي كا يعطيع قروض شريطة تخفيض ميزانية التعليم العمومي، و كا قولك أنه مضيعة للمال. لان هذا فخ و أكبر كذبة. الإستثمار فالتعليم و فالعالم البشري هو أعظم إستثمار يمكن تقوم به أي دولة، لأنه هو الركيزة.

الإستثمار فالتعليم عن بعد لأنه هو المستقبل، و هادشي شفنا الأهمية ديالو، فوقت جائحة كورونا.

خاص وزارة التعليم فأي دولة تكون مستقلة بحال إستقلال القضاء، و ما خاصخاش تكون تابعة للنزوات و الحسابات السياسية. و خاص وزير التعليم يكون شخصية مميزة، ماشي باش نرضي واحد الحزب نعطيه وزارة التعليم بحال إلى كا نفرق فالورث

منع خوصصة قطاع التعليم من أجل ضمان الجودة و تكافؤ الفرص بين جميع شرائح المجتمع. لأن التعليم الخصوصي هو مشروع استثماري، و الهدف الأول ديالو هو الأرباح المادية. و هذا خطر على إستقلالية التعليم.

خاص المحتوى ديال المقررات الدراسية ما يكونش متأثر بجهات خارجية، هي تحكم فالمحتوى. لان هذا خطر على الأمن القومي للدولة. لأنه أكيد دولة أجنبية ما غاديش تبغي لك الخير، و تعطيك أدوات لي تخليك مستقبلا تفوق عليها.

خاص كل دولة تستوعب أن الشعب الواعي فيه مزايا أكثر من الشعب الجاهل. فبالرغم من أن الشعب الواعي كا يزير الحكومة، و كا يدير ليها ضغط و كا يحاسبها عكس الشعب الجاهل. لكن الشعب الواعي هو اول خط للدفاع عن الدولة من المخاطر الخارجية. شعب واعي ما كا يتبعش ريح لي جات. الشعب الواعي كا يوقف فظهر الدولة و كا يساهم فالثبات ديالها و التقدم ديالها و الأمن و الإستقرار ديالها.

الشعب الواعي فوقت الحرب كا يكون أعظم سلاح عند الدولة. أما الشعب الجاهل ف كايخلق لك حرب فقلب الدولة، و كا يخدم أجندات العدو الخارجي عن جهل. و خير دليل وباء كورونا و كيفاش الشعوب الواعية كان ساهل عليها أنها تلتازم بالحجر الصحي مقارنة مع الشعوب لي فيها الجهل. و عوض ما الدولة تحارب الوباء، كا تلقى راسها كتحارب الوباء و الجهل. و هادشي كا يكلف الدولة ملاييين الدولارات لي كانت كا تشطر باش ما تصرفهمش على التعليم

كل دولار كا تشطر عليه و تنقصو من ميزانية التعليم، ف راه غادي تخسر فالمقابل ديالو مئات الدولارات سنويا من بعد. و لأجل غير مسمى ( البطالة، الجريمة،.... )

و آخر جملة غادي نقولها "عَبدٌ و رأي، أعظم خَطرا من عَبدٍِ و حَرْبَة" الإنسان المتعلم أفضل و أنفع لأي دولة من السلاح المتطور، و لكم في ألمانيا الحديثة خير مثال.

ملحوظة : هذا فقط جزء من مقالات متفرقة لي غادي تكون على التعليم، لأن المشاكل ديال التعليم صعيب تطرق ليها فمقالة واحدة.

إلى قريتي المنشور كامل، حاول تفاعل معاه باش نعرفو كيف العادة راسنا فين غاديين

إلى اللقاء