الفـــــــــــــــــــــــــــــــــــــــــــــــــــــــــايد

 [ كلشي هضر على الفايد و العلماء و أنا ما نهضرش ؟ ايوا حتال هادي لا

بصدق و الله ما كنت باغي نتحدث فهاد الموضوع ، لكن كمية المغالطات كثيرة، و هاد زوج سطورة فقط للتوضيح و وضع النقاط على الحروف

البداية كيف العادة باش نتفاهمو عليها، غالبية ( كنسطر على كلمة غالبية ) المعلقين بما فيهم العبد الضعيف كاتب هاد الاسطر، ما عندهم المستوى العلمي من حيث الشواهد و الديبلومات سواء لي عند الفايد او لي عند منصف سلاوي. و أي شخص ايشكك فصعوبة الحصول على هاد الكم الهائل من الديبلومات فهو يشبه داك المعاق رياضيا لي جالس فالمقهى و ما ينتاقد كريستيانو و الأداء ديالو و أحيانا ينتاقد حتى المدرب و لي قال لعصيدة باردة يدير يدو فيها، حيت خاص يكون وجهك صحيح باش تكون معاود سنة الاجازة او البكالوريا سنتين او أكثر و تجي تقول دوك الشواهد ساهل الحصول عليها

ندوزو دابا للفايد، السيد له ما له و عليه ما عليه، الاختصاص ديالو حسب معلوماتي هي التغذية ماشي الطب، و التغذية عندها بالدرجة الأولى دور وقائي( و أي شخص طبيب كان او عالم قالك أن علم التغذية زايدة ناقصة ما عندها حتى دور فالصحة، تقدر تقول ليه يمشي يدير شي حرفة أخرى ) و التغذية بالدرجة الثانية عندها دور تكميلي و كنسطر على تكميلي فالعلاج.

يعني أن التخصص ديال الفايد راه جد مهم و لا يقل عن التخصصات الطبية الصرفة، و الناس لي كيقولوا الفايد ماشي طبيب إذن ما تسوقوش ليه، هم غالبا إما جاهلين بالدور ديال التغذية، اما قطعان غنم تابعين الموجة والسلام. لأنه كيف شرحت من قبل التغذية و العلاج زوج ديال الأشياء مختلفة و كل واحد منها لا يقل اهمية عن الاخر.

ندوزو دابا للمشكلة( حسب نظري ) هي ان الفايد تجاوز مساحة الوقاية و نتاقل لمساحة العلاج، و هنا خرج من التخصص ديالو سواء عن قصد او غير قصد، سواء عن علم او بدون علم. و هادشي لي خلاه محط انتقاد ديال الأطباء لأنه دخل فالمجال ديالهم لي ماشي هو التخصص ديالو.

شخصيا أنا متفهم لردة فعل الاطباء، و حاس بيهم، لانه نفس الإحساس لي كنت كنحسو فاش كنشوف واحد اليوتيبر ( فعالم التقنية ) كيتكلم فالبرمجة المعلوماتية و الهندسة بدون علم ( سواء عن قصد او غير قصد ) و شريحة من الشعب تردد وراءه الخزعبلات

إذن الانتقاد الموجه للفايد بخصوص إعطاء وصفات للشفاء من الامراض هو انتقاد مشروع، لكن الانتقاد ديالو كإختصاصي فالتغذية و النصائح ديالو فمجال الوقاية عن طريق التغذية الصحية فهو انتقاد غير مشروع.

رآه الأم ديالك إلى قالت لك لبس مزيان باش ميضربكش البرد راها ماشي طبيبة و ماشي تدخلات فالطب، لكن تدخلات فمرحلة الوقاية، و فاش تمرض ديك ساعة خاصك العلاج عند الطبيب.

الطبيب ايضا يقدر لعطيك نصائح فالوقاية ماشي عيب.

المشكل فنظري هو أكبر من قضية الفايد، المشكل هو غياب اهل التخصص فاللحظة لي كنفتاقدوهم فيها. الفايد لعب دور جد مهم و مشكور عليه فمجال التوعية من مخاطر التغذية الصناعية، الأمر لي قلال الناس لي كيتكلمو عليه، سواء خوفا من الشركات الصناعية، او لأنهم مقابلين المشاريع ديالهم، بغيتي نصيحة فالتغذية سير عندو لمقر العمل، خلص و يقولك اش تاكل و اش ما تاكلش.

إذن فالوقت لي لفايد يكون كيتكلم على التغذية الصحية كوقاية و كنسطر على كلمة وقاية سمع ليه مزيان راك غادي تستافد. و فالوقت لي يقولك زيت العود كتعالج السرطان، قلب 9,6 و عوج لداركم و شوف طبيب اختصاصي ينصحك.

واحد الصديق فالمجموعة تناقشت أنا وياه على هامش واحد الموضوع فالمجموعة بخصوص الخلفية الدينية ديال الفايد. انا قلت لصاحب المنشور لي كان كيتكلم على عدم احترام لفايد للمنهجية العلمية ما يلي :

"كنتي غادي مزيان فاش قلتي عندك حكم نقدي، و تكلمتي على المنهجية العلمية، لكن فاش قلتي السيد داير تلفاز فيه صور ديال كتب دينية يعني كيقلب على خلط الدين بداكشي، هنا خرجتي من المنهجية و دخلتي رأيك الشخصي الغير علمي لانك ماشي طبيب نفسي او محلل ديكور."

داك الصديق قالي اودي راه الفايد كيدير دروس فالمسجد، إذن راه خلفية دينية، قلت ليه أن المسجد فالأصل ماشي غير مكان للعبادة، هو مكان للتوعية. مثلا تقدر تسمع خطيب جمعة كيتكلم على إحترام قانون السير فالمسجد. تقدر تسمع خطيب الجمعة يتكلم على المسيرة الخصراء، على مدونة الأسرة... يعني ماشي بالضرورة يكون الموضوع ديني بحث...

و يمكن يجيبو طبيب مثلا او طبيبة اختصاصية فأمراض النساء دير توعية للنساء فالمسجد بعيدا عن العقائد و العبادات.

يقدر يكونو المسيرين ديال المسجد لي طلبو منو يدير درس فالمسجد.

فكما تعلم و يعلم الجميع خاصة فالسنوات الاخيرة يستحيل شي شخص يدير درس فالمسجد بدون رخصة الوزارة الوصية، إذن بكل بساطة و بلا منمشيو بعيد، السيد ستدعاوه و حضر، كون ستدعاو طبيب فشي تخصص مثل داء السكري كون حضر عادي.

المفيد المختصر:

الفايد له ما له و عليه ما عليه، الخطأ صدر منو فاش تجاوز منطقة الوقاية، و نتمنى هادشي ما يتكررش. ردة الفعل ديال الأطباء منطقية. لكن هادشي ما خاصوش يتحول لمهاجمة و تبخيس للدور لي قام به الفايد كيف قلت فمجال التوعية الوقائية طيلة سنوات، و أيضا هادشي ماشي مبرر للتقليل من قيمة و أهمية الدبلومات لي عندو.

و الإنسان الى غلط ماشي نوضو نضربو ليه كلشي فالصفر، رآه كل إنسان عندو الإنجازات ديالو و الهفوات ديالو، و إلى بقينا كنحكرو و نتسناو بنادم يغلط باش نخرجو فيه الكبت ديال الفشل لي عندنا، رآه كلشي ايخوي ليكم لبلاد

شخصيا كنقتارح دوك القنوات لي كيتدعمو من المال العام، يديرو برنامج نصف شهري( الى ما كانش أسبوعي ) يستاضفو فيه الفايد كأخصائي فالتغذية الصناعية و يجيبو معاه طبيب، باش يكون تكامل و كل واحد يفيد فمجال التخصص، و تعم الفائدة على الشعب كامل.

الى اللقاء