[ثقافة عامة فالنصب البنكي 😋 ]

هاد الرسالة موجهة لاي شخص عندو بطاقة بنكية فإطار التوعية 😁

القضية بسيطة، غادي يجيك إتصال من رقم خدمات ( رقم غير عادي ). الشخص المتصل غادي يعرف ليك راسو على أنه موظف فالمؤسسة البنكية لي انت زابون فيها، و غادي يقولك أنك ربحتي قسيمة شراء لشي سبب، مثلا أنك شريتي شي لعيبة من شي متجر 😄

هاد الشخص المتصل غالبا غادي يكونو عندو شوية ديال المعلومات عليك مثلا الإسم و تاريخ الازدياد و المدينة. المهم باش يتبتك ايقولك أنت فلان و تاريخ الازدياد ديالك هو كذا؟ اتقوليه نعم. ايقولك جبد البطاقة البنكية ديالك باش يدير معاك إجراء روتيني. و من بعد ايعطيك الاربعة أرقام الأولى لي فالبطاقة البنكية ديالك ( انت غادي تزيد تيق به 🤣) و غادي يقولك باش نتأكد انك انت هو فلان، عطيني بقية الأرقام ( و فهاد اللحظة نفسيا بما أنه عطاك الأرقام الأولى و عزز الثقة ديالك فيه، و هو لي دابا كيطالبك أنك تبرهن ليه أنك فعلا صاحب البطاقة غادي تسرع حيت عارف راسك انك صاحب البطاقة )، غادي تعطيه بقية الأرقام. من بعد ايقولك قلب البطاقة ديالك، ايقولك فيها 7 ديال الأرقام، ايدير لك نفس القالب، ايعطيك الأرقام الأربعة و يقولك عطيني الأرقام الثلاثة، و غادي تعطيهم له 😁

السيد دابا عندو جميع المعلومات باش يدوز تحويل مالي او يشري شي حاجة من الانترنت، لكن كاين ابناك لي كدير la double authentification او تأكيد الهوية على مرحلتين، و إلى كان البنك ديالك كيدير هاد العملية( فالشخص النصاب كيكون الى علم ) و كيقولك دابا انصيفط ليك رسالة نصية فالهاتف ديالك فيها شي أرقام و خاصك تمليهم عليا باش نتأكد انك صاحب الرقم الهاتفي، و انت فالاسر و ديالك ما غاديش حتى تقرا الرسالة النصية لي فعلا غادي تكون مرسلة من طرف البنك الحقيقي و غادي تعطيه دوك الأرقام لي بيهم غادي يكمل عملية النصب.

ديك الرسالة النصية فعلا كتصيفطها لك البنك ماشي النصاب( هو كيقولك راه انصيفط لك دابا رسالة نصية حيت عارف أنها غادي توصلك من البنك بمجرد ما هو يدير التحويل المالي ). البنك كيصيفطها لك باش يتأكد أنه فعلا الشخص لي دوز العملية هو نفس الشخص لي عندو داك الرقم، لكن بالسذاجة ديالك اتعطيه للنصاب باش يأكد الهوية ديالك 😎

دابا اتسولني كيفاش عرف الإسم ديالك و تاريخ الازدياد و المدينة و الحروف الأولى للبطاقة ديالك و سمية ديال البنك 😇

اسيدي هاد النصابين كيشريو هاد المعلومات من اشخاص و شركات لي كتبيعهم فالويب المظلم (dark web) و كتكون إنما شراتهم او سرقاتهم من شركات أخرى خاصة قواعد البيانات ديال مواقع التجارة الإلكترونية، حيت هاد المواقع فاش كتشري منها، كتسجل الإسم الكامل ديالك و تاريخ الازدياد و تاريخ انتهاء صلاحية البطاقة البنكية و حتى العنوان ديالك و إسم البنك، لكنها ما كتسجلش الرقم الكامل للبطاقة البنكية، فقط الأرقام الأربعة لسبب بسيط حيت ديك الأرقام كتعاود فجميع البطاقات البنكية على الأقل عند نفس البنك، يعني يكفي أن داك النصاب يعرف فقط اسم البنك ديالك و يمشي يشوف اي بطاقة ديال داك البنك باش يعرفهوم 😁 و حتى الأرقام الأربعة لي فالخلفية ديال البطاقة، و هاد الأرقام يمكن يحصل عليهم ايضا بنفس الطريقة ديال المعلومات الشخصية مباشرة من قاعدة البيانات ديال الموقع التجاري.

لكن و الأهم هو بقية ارقام البطاقة و ايضا الأرقام الثلاثة لي فالخلفية، هادوك هوما المفتاح، هوما كلمة السر و ما عمرك تعطيهم لشي واحد كيف ما بغا يكون، شفتي يجي عندك مدير البنك شخصيا و متعطيهومش له 😁

و للمعلومات فاش شي موظف فالبنك يتاصل بك فهو من المفروض عندو جميع المعلومات عليك مايحتاجش تقوليه الأرقام الأمامية ديال البطاقة، يقد مثلا يسولك على الإسم ديالك و تاريخ الازدياد باش يتأكد، لكن ما غاديش يطلب منك اي معلومة أخرى متعلقة بالبطاقة البنكية باش يتأكد من الهوية ديالك. 

لكن إلى كنت انت لي تاصلتي بالبنك عبر الرقم الرسمي المخصص لخدمة الزبناء، فهنا ممكن يطلب منك معلومات اضافية باش يتأكد أن المتصل هو صاحب الحساب، لكن كنعاودها عمرك تعطيه الأرقام الثلاثة لي فالخلف ديال البطاقة و فاش توصلك شي رسالة نصية و يطلب منك تعطيه الأرقام لي مكتوبة فيها، قرا الرسالة النصية( غالبا هاد النوع من الرسائل كيكون بالعربية و الفرنسية ) و إلى ما كنتيش قاري، قوليه يعطيك و سيلة أخرى باش تأكد الهوية ديالك حيت مفهمتيش مضمون الرسالة و لاش صالحين دوك الأرقام.

بس: هاد الإجراءات و سيناريوهات النصب أكيد كتختالف من بنك لبنك و من بلد لبلد، لكن الخطوط العريضة دائما هي نفسها، و خاصة الأرقام الثلاثة لي فالخلف و الرقم لي كيوصلك بالرسالة النصية.

إلى اللقاء

منقول من صفحة MBS